Bibelen må vera premissleverandøren
Mange ser på Bibelen berre som nedteikningar av samtida sine religiøse erfaringar og deira gudsforståing. Dersom dette viser seg også å vera det norske folket si haldning, får vi nok fortsetja med å gjera våre erfaringar, men som Bibelen seier: Vi vert overlete til eiga sviktande dømmekraft.
Eg har i nokre tiår merka meg at samtida sine verdslege ideal blir gjort til grunnlagsmateriale eller premiss i den teologiske debatten. Det vert for eksempel meir og meir vanleg at biskopane i Dnk er viljuge til å lata verdslege og bibelstridige synspunkt få innpass både i kyrkja sitt liv og i kyrkja si lære.
Døme på at så er tilfelle kan vera at biskopar som gjev seg sjølv vitnemålet at dei er konservative og bibeltru, er beredvillige til å ordinera til biskopar menneske som openbert går mot Bibelen sitt bodskap. Til tider fører det til eit splitta bispekollegium. Men i 1995 innførde biskopane ein ny regel for å løysa teologiske stridsspørsmål: Fleirtalet sitt syn skulle vera avgjerande og bindande for heile kollegiet. Om mindretalet meinte at fleirtalssynet var i rak motsetnad til Bibelen si forkynning, skulle likevel mindretalet i bispekollegiet bøya seg for fleirtalet. Fleirtalet sitt diktatur vart godteke som teologisk verktøy. Det lutherske prinsipp om at «Skrifta åleine» avgjorde saka, vart avskaffa.
Men den situasjonen som eg ovanom har beskrive, at kyrkja rettar seg etter verdsleg veremåte og synspunkt, er ikkje av ny dato. Så vidt som eg forstår historia, har det kjenneteikna kyrkja etter at ho byrja å samarbeida med staten: Skulle eit teologisk vedtak ha ei framtid, måtte vedtaket eller synspunkta vera i samsvar med samtida sine politiske ideal.
Dette var praksis også i dei første århundra av vår tidsrekning. Den gongen spurdest det om lovnadane i Bibelen til jødefolket sto ved lag etter Kristus, og om jødefolket si stilling som Guds utvalde folk, varde ved eller var oppheva.
Jødane sto lågt i kurs i Romerriket. Og kyrkja følgde opp med å utforma ei lære om jødefolket si skuld og fordøming. Det blei på den måten sådd tvil om Bibelen sitt truverde. Guds lovnader til Abrahams etterkomarar, israelsfolket, vart omtolka til å gjelda kyrkja. Ein drista seg til å riva lovnadene laus frå den samanhengen og den tradisjonen dei var sagde inn i eller gjevne til. Israelsfolket var skuldige til fordøming og pine. Denne tradisjonen følgde Martin Luther opp.
Artikkelen fortsetter under annonsen.
Vi ser altså at diskusjonen om Gud sine lovnader til israelsfolket framleis står ved lag, er av gammal dato. I dag er fordøming og hetsing av Israel vorten ein aktivitet som kjenneteiknar kyrkjelege rådsorgan. Jamfør dette med at det er kort tid sidan vi i Noreg hadde ein minister i kongens råd som oppmoda til økonomisk boikott av Israel.
Orda i Bibelen om at mot slutten av tida skulle israelittane få oppleva at straffa/landsforvisinga var over, og at folket igjen skulle samlast i fedrane sitt gamle land og også få landet i si eige og bli til ei velsigning for heile verda, er utanfor trus-horisonten.
Men spørsmålet om homofili har tydelegvis også stått på dagsorden alt i dei første tiåra av kyrkja si tid. Guds sendebod til heidningane, apostelen Paulus, tok opp det spørsmålet, som på den tida var like dagsaktuelt som no.
Djevelen sitt eldgamle knep: «Har Gud verkeleg sagt?» viser seg like forlokkande og forførande no som i Paradisets hage. Og svaret no er: Nei, Gud har ikkje sagt noko om homofile ekteskap. Difor må det kunna godkjennast og velsignast! Og har han sagt noko, har han ikkje meint det bokstaveleg. I den gamle tida visste dei ikkje så mykje om homofil kjærleik.
Bibelen vert altså sett på som partsinnlegg skrive for dåtida/samtida, ikkje som ord frå Gud med gyldighet frå æve til æve.
For meg ser det ut til at leiarskapet i kyrkja har gløymt at Israel også er Guds demonstrasjonsfolk, også når det gjeld synda sine fylgjer for folk og land
Vi må ikkje lata oss lura av Djevelen sitt narrespel. Bibelen gjev oss mange døme på kva fylgjer det får både for einskildmenneske og for nasjonar å mistru Gud.
Eg meiner det er relevant å likna Den norske kyrkja sin menighet med ein saueflokk utan hyrdingar. Biskopane oppfører seg som ekspedisjonsorgan for den verdslege myndighet. Og leiarane i Presteforeninga vaskar hendene og seier at dei som prestar ikkje har noko sjølvstendig ansvar. Dei berre tek konsekvensane av biskopane si avgjerd og er lydige mot sine overordna. No blir det uhyre spennande om Kyrkjerådet framleis vil sjå på fleirtalsbiskopane som hyrdingar og fylgjer dei blindt - utføre stupet!
Artikkelen fortsetter under annonsen.
Og det utrulege har skjedd: Heile bispekollegiet, også dei som var i mindretal, seier at ulikt syn på homoseksualitet ikkje er ei så alvorleg sak at dei ikkje kan fungera i den same kyrkja. Det som det same kollegiet for få år sidan stempla som kyrkjesplittande vranglære, er no ok.
Fleirtalet sitt syn bind!
Verdas mest unike bok, Bibelen, Guds ord, er forkasta av dei som skal vera vegleiarar i Den norske kyrkja.
Mange menneske har vanskar med å fatte at det går an å ha ei djupare forankring enn menneskerettane, politiske programformuleringar og dei til ei kvar tid gjeldande fleirtalsvedtak. Dette gjeld tydelegvis også for det kyrkjelege leiarskapet.
Bibelen må vera premissleverandøren som korrigerer samtida sine villfaringar, ikkje omvendt.
Eg er ikkje nokon spesielt from mann. Så visst ikkje. Eg skriv dette fordi eg kjenner på angst for framtida når eg ser korleis utviklinga går. Det er soga om «litlefingeren og heile handa» som ver illustrert for augo våre.
Mange ser på Bibelen berre som nedteikningar av samtida sine religiøse erfaringar og deira gudsforståing. «Dei gjorde sine erfaringar. Vi må gjera våre røynsler!»
Dersom dette viser seg også å vera det norske folket si haldning, får vi nok fortsetja med å gjera våre erfaringar, men som Bibelen seier: Vi vert overlete til eiga sviktande dømmekraft.
Artikkelen fortsetter under annonsen.
Den norske kyrkja Kjell M. Sinnes Kvinesdal