Tilbyr dåpsritual utan synd og djevel
Foreldre og faddrar i Church of England må ikkje lenger love at dei omvender seg frå syndene sine og forsakar djevelen ved dåp. Læremessig utvatning, meiner kritikarar.
Mange familiar som ber barnet sitt til dåp i England, er sjeldan i kyrkja. For desse kan den gjeldande dåpsliturgien verke komplisert og utilegjengeleg. Det skriv Liturgikommisjonen Church of England i eit notat til ein alternativ dåpsliturgi som vert testa ut i fleire hundre kyrkjelydar fram til påske i år.
Siktemålet skal vere å uttrykkje at Gud først og fremst ønskjer å ta imot menneske med nåde, samstundes som ein held fast ved at dette føreset omvending og tru på Kristus.
Artikkelen fortsetter under annonsen.
- Minimerer mysteriet
Den nyskrive versjonen erstattar ikkje den førre, men vert tilboden som eit alternativ. Spørsmålet er om denne vil verte norma med tida, dersom Generalsynoden godkjenner han. Det kan vere at saka kjem opp allereie til handsaming allereie til sommaren.
Ein av dei som er sterkt kritiske til den nye varianten, er den tidlegare biskopen av Rochester, pakistanskfødde Michael Nazir-Ali. Han meiner endringa inngår i ein tendens som kan førast tilbake til 1970-talet der ein minimerer djupna og mysteriet i gudstenestefeiringa ut frå eit påstått behov for å gjere henne «tilgjengeleg» for folk.
- I staden for å forklare kva dåpen betyr og kva dei forskjellige delene av gudstenesta inneber, er løysinga å fjerne nøkkelelement i gudstenesta, skriv han i The Mail on Sunday.
Nazir-Ali hevdar iveren etter å få alle til å kjenne seg velkomne og ønsket om ikkje støyte nokon, fører til at ein nedtonar synda og dei personlege og sosiale konsekvensane ho medfører. Han påpeikar at den alternative liturgien ikkje fortel noko om Kristus, som kristne skal
Krev førebuing
Heller enn å forenkle seremonien, meiner Nazir-Ali at ein burde bruke bruke tid på å førebu folk på kva ritualet inneber.
- Behovet er ikkje å fjerne vesentlege læreområde, men å forklare dei, skriv biskopen som i 2009 gjekk for å starte The Oxford Centre for Training, Research Advocacy and Dialogue. Han har markert seg som ein talsmann for tradisjonell kristen tru, og har mellom anna ytra seg kritisk om sekularisering av Storbritannia og ukritisk tilpassing til islam.
Hjelp på trusreisa
Også biskopane av Machester og Willesden har teke til orde for at den alternative liturgien bør skrotast. Leiaren for Litirgikommisjonen, biskop Stephen Platten, forsvarar derimot forslaget. Han meiner synd, oppstode og frelse er inkludert.
- Du kan ikkje repetere dei i kvar einaste del av gudstenesta, heller ikkje bør du gjere det, seier han ifølgje The Church Times.
Artikkelen fortsetter under annonsen.
Ut frå eit «urbant misjonsperspektiv» meiner prest Paul Greenland i St. Andrew´, Chelmsford, at det er behov for ein alternativ tekst.
- Dåpsliturgien og -praksisen bør møte folk der dei er og så hjelpe dei vidare på trusreisa deira, seier Greenland.
Han avviser at han vil forenkle eller gå på kompromiss med omvending frå synd og at det er nødvendig å tru på Kristus og han krossfest.
- Men språket i dåpslutiturgien, og særleg i løfta og erklæringane, må vere tilgjengeleg, seier han.
DAGEN
