Bibelskule må seie opp lærarar
Bildøy bibelskole må kutte i staben for å få balanse i budsjettet.
To av lærarane ved Indremisjonsforbundet (ImF) sin bibelskule utanfor Bergen er sagt opp heilt eller delvis. Grunnen er vanskeleg økonomi, melder Sambåndet.
- Vi måtte gjere innskrenkingar og har nedbemanna tilsvarande 80 prosent stilling, seier rektor Roald Kvam ved Bildøy bibelskole til ImF si eiga avis.
Artikkelen fortsetter under annonsen.
Færre studentar
For å balansere budsjettet for 2013, må bibelskulen kutte inntil 1,3 millionar kroner.
Bakgrunnen for nedskjeringane er nedgang i talet på studentar og korleis studentane fordeler seg på første og andre år.
I år har bibelskulen totalt 77 studentar, men 29 av desse er andreårsstudentar (T2) - som ikkje løyser ut like mykje i statsstøtte og skulepengar som dei på førsteåret.
Berekraftig drift
Roald Kvam understrekar at nedskjeringane i staben både skal sikre balanse på kort sikt og sørgje for ei meir berekraftig drift på lengre sikt.
- Vi har vore i dialog med staben og dei tillitsvalde, og har klart å ta noko på realistiske kutt i drifta. Likevel kom vi ikkje utanom oppseiingar, seier Kvam til Sambåndet.
Droppar vikarar
Oppseiingane gjeld frå 1. august. I tillegg vil skulen vente med å hente inn vikarar for tilsette som er ute i fars- eller morspermisjon.
(Dagen)