Konferanse på fire språk

I Karasjok i Finnmark samlast kristne frå Nordkalotten til bøn- og vekkingskonferanse.

– I år har vi invitert læstadianarar frå Finland. Blant dei er det mykje fint som skjer. Mange får fornya møte med Jesus, seier Magritt Brustad, som er medlem av leiarskapen for bøn– og vekkingskonferansen i nord.

Til konferansen i Karasjok kjem det eit finsk ektepar. Dei er vitne til den læstadianske fornyingsrørsla og skal fortelje om den under eitt av møta, ifølgje Brustad.

– Det er ein konferanse vi har hatt i mange år. Føremålet er å samle vekkingsfolk på tvers av landegrenser og kyrkjegrenser, seier Brustad.

Gjester frå Russland

Konferansen startar med eit opningsmøte på torsdagskvelden. Dei påfølgjande dagane vert det undervisning på dagtid og møte på kveldstid. Og tidleg på morgonen samlast gjestene til bøn. I tillegg er det møte for ungdomen ved sida av dei andre møta. Det vil også vere eigne møte og aktivitetar for born.

– Vi er veldig glade for at vi har så mange som kjem frå Russland kvart år. Å regelmessig møte brør og systrer frå russisk side, for å be saman for områda våre, opplever vi som veldig verdifullt.

Frå Russland kjem eit ektepar som leier eit kristent forsamlingsnettverk på Kolahalvøya.

– Dette forsamlingsnettverket driv eit rehabiliteringssenter for rusavhengige. Mange av medlemene har ein historikk med misbruk av rusmidlar, men er frie frå det i dag. Det er inspirerande og trusstyrkjande å sjå kva Gud har gjort i dei forsamlingane.

Konferansen i Finnmark er tverrkyrkjeleg. Arrangørane ynskjer å samle vekkingsfolket i alle samanhengar, på tvers av grensene i nord. Hovudansvaret har lege hos ulike forsamlingar i Finnmark, Ungdom i Oppdrag og Nordic Mission.

– Vi flyttar konferansen frå stad til stad. I fjor vart den halden i Vesterålen, medan den i år vil gå føre seg i Karasjok. Folk kjem faktisk køyrande frå Vesterålen for å ta del, men også for å vere med og hjelpe til. Det er snakk om enorme avstandar mellom plassane her i nord, men vi opplever eit sterkt samhald. Det synest gjennom konferansen. Samhaldet har vorte ei viktig inspirasjonskjelde for kristenlivet i nord.

Under møta er det til stades tolkar som oversetter til engelsk, samisk, russisk og finsk, ut frå behov.

– Vi ønskjer å gje rom for at folk kan kome med korte vitnesbyrd og det dei måtte ha liggande på hjarta. Og vi ynskjer også å høyre kva ungdomen som står i ungdomsarbeid har å seie, seier Brustad.

Ungdomskonferanse

Agnete Haraune Amundsen er baseleiar for Ungdom i Oppdrag Borgen i Storfjord. Ho er ein av ungdomsleiarane under bøn– og vekkingskonferansen.

– Ungdomskonferansen er del av bøn– og vekkingskonferansen, men er samstundes ein eigen leirkonferanse. Vi vil vere i eit eige bygg, der vi overnattar og har møte saman, seier Amundsen.

Ho ynskjer at ungdomane skal verte godt kjente med kvarandre, både i Noreg og på tvers av landegrensene.