Pastor og lærar ut mot pride-marsj. Rektor åtvarar mot rolleblanding.

Pastor og lærar på Stord ungdomsskule, Jens Thoresen, går ut mot øyas første pride-marsj. Rektor meiner at han ikkje kan la synspunkta sine prega undervisninga.

Stord Sosialistiske Ungdom har teke initiativ til Stord sin aller første pride-marsj, kalla «Storapride», som skal arrangerast på laurdag. Lærar og pastor for Kristkyrkja på Stord, Jens Thoresen, går no ut mot arrangementet på menighetens heimeside og på Facebook.

«Eg kvir meg til å skriva dette innlegget. Mange vil mislika det, og nokre bli sinte. Det får våga seg», startar Thoresen innlegget.

- Gud sørgjer

Pastoren skriv at Gud sørgjer over pride-marsjen, ikkje fordi han er fornærma, men fordi «han veit at det einaste som kan gjera oss lukkelege, er at me følgjer han og er lydige mot hans bod».

Vidare skriv han: «Me hytter knyttnevene våre mot han, og ber han om ikkje å blanda seg inn i liva våre. Me trur at vår seksualitet er vår eigen, men ingenting er vårt. Tenk om Gud skulle ta oss på alvor og overlata oss til oss sjølve?»

Han legg til at han vil bruka laurdagen til å be om miskunn for Stord og dei som bur der, slik kyrkjelyden hans gjer kvar dag.

– Kan ikkje ta med seg private meiningar

Til den lokale nettavisa Stord24 uttaler rektor ved ungdomsskulen seg om Thoresens meiningar. Ho gjev uttrykk for at ein lærar ikkje kan la synspunkt som er i strid med læreplanen farga undervisninga.

– Skulen legg seg ikkje bort i kva han meiner privat så lenge han ikkje tek med seg haldningar som ikkje høyrer heime i skulen, seier rektor Anne Sissel Mugaas til avisa.

– Dette bør få konsekvensar

Thoresen har fått både negative og positive kommentarar på innlegget på Facebook. Ein kommentator meiner Thoresen vanskelig kan skilja mellom rollene som pastor og lærar.

«Uavhengig om du uttalar deg som privatperson eller «pastor» så er du ein lærar. At du velger å gå ut offentleg å skrive slik blir knytt til alle dine roller! Så at dette får konsekvenser for deg, det er vel lov å håpe», skriv ei Stord-busett kvinne.

Stig Magne Heitmann, som også er faglig leder i Åpne Dører, skriv i kommentarfeltet at «Det blir tøffere å stå for et klassisk ekteskapssyn/seksualsyn framover, og hevde at vi er skapt som hankjønn og hunkjønn.»

Ryddig på skulen, verre med media

Tysdag ettermiddag snakka Dagen med Thoresen etter at han hadde vore på skulen.

– Har du fått mange reaksjonar på det du skreiv?

– På skulen har me eit veldig ryddig og avklara forhold. Dei kjenner meg, og det er ikkje første gongen me snakkar om dei ulike rollene mine. Me gjekk gjennom korleis me jobbar i slike saker, og det var heilt uproblematisk. Elles har både NRK og VG har ringt meg i dag, og dessutan har det vore meir eller mindre lynsjestemning på Facebook. Så eg trur ikkje eg vågar å visa meg i Leirvik sentrum på laurdag, seier pastoren.

– Er det slik at det ikkje lenger går an å stå for eit kristent syn på ekteskapet utan å vera i konflikt med læreverket i norsk skule?

– Det er nok slik at det heterofile synet på ekteskapet er historie i norsk skule. Der vert homofile ekteskap sidestilt med det heterofile.

– Er det rom for to syn?

– Nei, det er ikkje rom for det klassiske synet. Og me er nok også komne så langt at eit læreverk ikkje ville blitt godkjent i Noreg dersom det hadde lært det klassiske synet på ekteskapet.

– Kva synest du om å vera lærar i ein slik kontekst?

– Det er jo ikkje ideelt, men som lærar må eg undervisa i det eg får beskjed om. Og når elevar tek opp spørsmål knytt til dette, forklarer eg at det finst andre syn , til dømes blant kristne og muslimar, seier Thoresen.