Kristen demonisering av Israel

Mediehetsen mot Israel har over tid ført til aukande antisemittisme i Europa.

For nokon år sidan vart det starta ein religionsdialog mellom toppar i Kirkenes Verdensråd og islamske leiarar. Noko positivt resultat av dette er vanskeleg å sjå i den muslimske verda. Kristne vert forfylgde som aldri før. Verst er det i muslimske land, og land der islam er på frammarsj til dømes i Nigeria og Somalia. I Midt-Austen, området der kristendomen hadde si vogge, har talet på kristne minka sterkt, også i dei palestina-arabiske sjølvstyreområda. I Israel har kristne fridom og aukar i tal, trass i uretten Israel opplever frå store deler av den kristne verda.

Kva Kirkenes Verdensråd har lova i dialogen med islam, kjenner eg ikkje formuleringar på. Men resultatet vert tydelegare og tydelegare, ført nedover i medlemskyrkjene. Her i landet er det Mellomkirkelig Råd som ser ut til å ha fått oppgåva med å påverka kristenfolket til å tru på den islamistiske versjonen av konfliktene og årsakene til desse.

LES OGSÅ: Klimaskifte i israelsdekningen

Mellomkirkelig Råd har eit opplegg som heiter Kirkelig ledsagertjeneste. Her vert tale- og skriveføre kristne inviterte til å vera med på eit styrt opplegg i Israel og mest i dei palestina-arabiske sjølvstyreområda. Og dei har så i oppgåve å spreia det «rette» synet når dei kjem heim att.

Den 28.11.14 sende ei rekkje leiarar i Den norske kyrkja, med dei tre biskopane Solveig Fiske, Tor B. Jørgensen og Erling Pettersen i spissen, ut eit felles opprop mot Israel. Seriøsiteten i dette vert godt illustrert med denne formuleringa om grunnlaget for vår jolefeiring: «når vi minnes underet i datidens Palestina».

I slutten av september vart den siste årlege «Kirkeuka for fred i Palestina og Israel» arrangert. Denne har også det same føremålet: Å få dei kristne til å slutta å sympatisera med Israel. Pro-islamsk informasjon, innpakka i elles fine formuleringar, ser ut til å vera verkemiddelet. Og boikott av Israel, det einaste landet i området som tek menneskeverd og menneskerettar på alvor, inklusiv religionsfridom. Fred skal det verta, dersom Israel gjev opp «okkupasjonen». Israel skal tvingast til å godta ein ny islamsk stat i Judea og Samaria, styrt av organisasjonar som har som vedtektsfesta føremål å utsletta Israel og folket der. Og som ikkje eingong er villige til å forhandla om dette grunnleggjande spørsmålet.

LES OGSÅ: Kristenledere til NRK: – Ta grep for å unngå ubalanse og slagside mot Israel

No har også Mellomkirkelig Råd, med biskop Erling Pettersen som leiar, teke til å interessera seg for reiseselskapa som arrangerer turar til Israel. Desse er det viktig å få styring over.

Nokon har også funne opp klengenamnet «kristensionistar», for å stigmatisera kristne som ikkje let seg påverka i denne leia.

Mediehetsen mot Israel har over tid ført til aukande antisemittisme i Europa. Dersom den kyrkjelege aktiviteten på dette området lukkast, vil det medverka i same leia. Det at oponionen i Vesten er så lett å manipulera, er til stor inspirasjon for den konservative, militante islamismen som aller mest er ei ulukke for folket som må underkasta seg dette religiøse samfunnssystemet. Dessutan kjem fredsløysingar i Midt-Austen ikkje nærare når slike krefter får støtte frå norske kristne.