UTRYDNINGSTRUGA: Vipa er kalla Jærens nasjonalfugl, og ho er fylkesfugl for Rogaland fylke.

Vipa – elska og utryddingstruga

Det var både gjevande og litt sårt å få i hendene denne innhaldsrike og flotte boka om fuglen me alle er så glade i – særleg her på Jæren – vipa.

Gjevande av di det var så kjekt og triveleg å ta til seg all den kunnskapen som boka inneheld. Men litt sårt av di arten er truga. Kanskje ikkje minst her i denne regionen, der hovudgrunnen er eit offensivt landbruk.

Artikkelen fortsetter under annonsen.

BOK: Gaute Grønstøl har skrevet «Vipa. Kamp og kurtise i kulturmarka».

Doktorgrad i vipe

Forfattaren (fødd 1968) er biolog og tok i 1994 hovudfagseksamen i zoologisk økologi med ei oppgåve om viper. I 2001 disputerte han med ei doktoravhandling om vipe-åtferd.

Han har i periodar opphalde seg her på Jæren, av di det er mange viper her. Grønstøl har også forska på vipe i områda rundt Bergen og på Øland. Vipa og livet ho lever, er gjennomanalysert, ja, ho er så godt som gjennom-dissekert.

Meldt/Bok

Gaute Grønstøl

Vipa

Kamp og kurtise i kulturmarka

Eige forlag, 2020

Innbunden, 124 sider

Alt og alle sider ved vipene er målt og vege. Fargefotoa er mangfaldige og flotte. Det er nesten berre lyden av vipa som manglar.

Her i området er jo vipa sentral i Time kommune sitt kommunevåpen. Vipa – eller vibå som me uttalar det her i desse traktene – er også kalla Jærens nasjonalfugl, og ho er fylkesfugl for Rogaland fylke.

Vår og vipe

Vår og vipe er eit ordpar som ein vanskeleg kan skilja. Men arten er altså truga, ikkje minst her i landet, i dei områda ho oppheld seg. Ikkje minst er det eit offensivt og stadig meir mekanisert landbruk som utgjer trugsmåla. Men også attgroing, rovdyr og rovfuglar er konstante fiendar av vipa, ikkje minst vipeegg og nyklekte vipeungar.

Vår og vipe er eit ordpar som ein vanskeleg kan skilja.
Paul Odland, Meldar

Før i tida kunne ein også samla vipeegg, og mellom andre syntest Kong Haakon VII at slike egg var ein delikatesse. Men i 2005 kom det eit forbod frå EU mot å sanke egg, som Noreg slutta seg til. Bakgrunnen var nettopp ein markant nedgang ai talet på fuglar i alle land i Europa der vipa finst.

Likevel er det framleis fem EU-land der det er tillete å jakta på vipe; Frankrike, Italia, Spania., Malta og Hellas. Grønstøl legg ikkje skjul på at han meiner slik jakt må stoppast, om ein har som mål at arten skal overleva.

Artikkelen fortsetter under annonsen.

Flotte vipe-bilete

Grønstøl skriv først om korleis vipa er bygd opp, vidare om hekking, matvanar, reirbygging, val av make – eller kanskje rettare; makar, av di ny forsking syner klart at vipa i svært mange tilfelle er polygam.

Paring, egglegging, ruging, ungeperioden, trekk, overvintring – det er med alt saman. Til dels med såpass detaljert info at eit og anna blir vanskeleg for ein lek lesar å skjøna. Men du verda – eg er imponert over all kunnskapen Grønstøl har tileigna seg.

Og ikkje mindre imponert over alle flotte vipe-bileta. Både jærbuar og andre vipe-interesserte, og alle slags ornitologisk interesserte især: Ta og les!