Kristent selskap lagar Hollywood–film om grottedrama

Det vert Hollywood–film ut av bergingsaksjonen i Thailand, der eit fotballag med tolv gutar og trenar var fanga i ei grotte i atten dagar.

Det melder det kristne filmselskapet Pure Flix.

– Eg kunne ikkje ha vore meir oppglødd. Denne historia har hatt så mykje å seie for meg medan eg har følgd den her i Thailand, seier Michael Scott, administrerande direktør i Pure Flix, i eit videoklipp delt på selskapet si Facebook–side tysdag førre veke.

Scott bur i Thailand og var til stades ved Tham Luang–grotta då gutane vart berga. Den thailandske kona hans voks opp med Saman Kunont, marinejegaren som døydde av mangel på oksygen under bergingsaksjonen.

– Å sjå alt det heroiske motet i den grotta, og deretter få alle dykkarane ut. Det har berre vore ei så rørande og personleg hending, seier han i klippet.

Vidare seier han at dei ser på dette som ein film som vil vere til inspirasjon for millionar av menneske over heile verda.

David A. R. White, som var med på å stifte Pure Flix saman med Scott, opplyser at selskapet er i kontakt med skodespelarar, manusforfattarar og potensielle investorar, ifølgje Wall Street Journal.

I ei pressemelding takkar filmselskapet Gud for ein vellukka redningsaksjon.