Kvitsund vil skifte ut omdiskutert hefte
Rektor ved Kvitsund Gymnas varslar at ein vil finne «anna egna materiale» til etikkundervisninga enn heftet som har utløyst heftig debatt.
Tysdag føremiddag gjekk rektor Torleif Belck- Olsen ut med ei pressemelding om etikkundervisninga ved Kvitsund Gymnas.
- Kvitsund Gymnas er ein kristen friskule som har godkjend alternativ undervisning i kristendom. Det bør vere ei sjølvfølgje at vi kan stå for klassisk kristen etikk utan å bli truga med å miste statsstøtta, seier han.
Artikkelen fortsetter under annonsen.
AUF-leiar Eskild Pedersen tok til orde for å kutte offentleg finansiering av skular som Kvitsund etter at det fredag vart kjent at ein elev hadde klaga skulen inn for Fylkesmannen i Telemark. Også kunnskapsminister Kristin Halvorsen (SV) har rasla med sablane. Eleven hevda ein vart undervist at abort er mord, også ved valdtekt, og at homofili kjem av ein skade i to-tre-årsalderen.
LES OGSÅ: Savner nyanser om homoutvikling
Ulike teoriar
Merksemda har særleg gått på eit hefte som er utarbeidd av Eivind Gjerde, teolog og tilsett som lektor ved Kvitsund Gymnas.
Dagen har fått tilgang til heftet, som omhandlar ei rekkje etiske emne og er på 54 sider, og presenterte dei omdiskuterte avsnitta i tysdagsavisa.
- Når det gjeld spørsmålet om homofilt samliv, held Kvitsund fast ved at ramma for det seksuelle samlivet er ekteskapet mellom mann og kvinne. Vi vil også halde fram at eit lite foster har menneskeverd og rett til liv. Det er ikkje slik at Kvitsund lærer elevane noko spesielt om kva som er årsaka til ein homofil legning. I heftet som blir nemnd i brevet vert det derimot presentert ulike teoriar om dette, seier rektor Belck-Olsen.
Trekkjer heftet
Ved Kvitsund er faget kristendom eit programfag med fem veketimar over to år. Faget har ein læreplan som er godkjend av Undervisningsdirektoratet.
- I timane vil elevane møta ei tilrettelegging som byggjer på vedtektene og klassisk bibelsk kristendom, slik som trua har vore og vert vedkjent av den verdsvide kyrkja. Det leggjast opp til samtale og diskusjon med elevane, og det er viktig for oss å møte innvendingar på ein respektfull måte, seier Belck-Olsen.
Han lovar å svare på Utdanningsdirektoratets brev med spørsmål om det omdiskuterte heftet.
Artikkelen fortsetter under annonsen.
- Heftet er ikkje på boklista i kristendom, men har vorte nytta av læraren då det ikkje finnest godkjend læreverk i faget. Kvitsund vil difor finne anna egna materiale, seier Belck-Olsen.
(Dagen)
