Kongeparet og kronprinsen til Kyrkjemøtets gudsteneste
Både kong Harald, dronning Sonja og kronprins Haakon vil delta når Den norske kyrkja held festgudsteneste i samband med Kyrkjemøtet i oktober.
Kongen, dronningen og kronprinsen deltar når Den norske kyrkja markerer ny preses, nytt kyrkjemøte og nytt kyrkjeråd med ei festgudsteneste i Nidarosdomen 11. oktober 2020. Dette melder Slottet.
På grunn av smittevernrestriksjonane i vår vart vigslingsgudstenesta til Den norske kyrkjas nye preses Olav Fykse Tveit halde i avgrensa former i Nidaros domkyrkje 10. mai i år.
Artikkelen fortsetter under annonsen.
Under festgudstenesta den 11. oktober i samband med Kyrkjemøtet skal ein derfor markera både ny preses, nytt kyrkjemøte og nytt kyrkjeråd. Festgudstenesta blir ei avslutning av årets korona-utsette Kyrkjemøte, som blir arrangert 8.-11. oktober i Trondheim.
Preses Olav Fykse Tveit vil leia gudstenesta saman med Nidaros biskop Herborg Finnset, skriv Dnk i ei pressemelding.
I tillegg til medlemmene av kongefamilien vil stortingspresident Tone W. Trøen, sametingspresident Aili Keskitalo og barne- og familieminister Kjell Ingolf Ropstad vera til stades saman med ordførar, fylkesordførar, fylkesmann, Kyrkjemøtets delegatar, leiar i Kyrkjerådet, alle biskopane i landet og inviterte gjester.
Domkantorane Petra Bjørkhaug og Karen Haugom Olsen, Nidaros domkor, Jon Pål Inderberg og Carl Håkon Waadeland bidrar musikalsk. Gudstenesta blir overført direkte på TV i NRK1 og på radio i NRK P1.