Paul Odland
Fekk leva for å laga falske pengar
Moritz Nachstern var ein av dei ytterst få norske jødane som kom levande heim att frå nazistane sine dødsleirar. Få år etterpå skreiv han saman med Ragnar Arntzen boka som den gongen vart kalla «Falskmyntner i blokk 19». Boka vart fort gløymt. Men no er den same boka til all lukke henta fram att, slik at me kan lesa denne ytterst fascinerande og dramatiske soga, vel seksti år etter at det hendte.
Det finst fleire bøker om og av norske jødar som overlevde Holocaust. Dei er dramatiske alle; og ytterst naudsynt at dei finst på marknaden. Eg set likevel eit stort kryss ved denne. Ikkje minst avdi boka er vorten til få år etter at andre verdskrig var slutt; og avdi ho gjev eit nærbilete av alt det vonde dei måtte gjennom; dei som trass alt overlevde. Det er ei pine å lesa om all fornedring og vondskap.
Men dertil også den sjeldne og spanande soga om blokk 19, der Moritz og mange andre hamna; der litt av kvart skulle foregå; nemleg dette: Det skulle prentast store bunker med pund-setlar, som skulle sleppast ned over Storbritannia, og slik sett skapa megainflasjon og øydeleggja heile infrastrukturen i samfunnet. Det var store visjonar knytt til prosjektet; difor vart folk som hadde kunnskap om grafikk, teikning, bankfolk, trykkarar og andre med likandne yrkesbakgrunnar, samla i blokk 19. Mange av dei var jødar. Arbeidet gjekk føre seg i det stille; ingenting måtte koma ut. Fangane her visste med seg sjølve at dei fekk leva så lenge trykkmaskinane gjekk. Etterpå måtte dei vekk, det vil seia, i omnane med dei! Men så lenge det var liv, var det von. Og faktisk; nokre av dei klarte å berga seg ut frå ragnarokket til slutt.
Før alt dette, skildrar Nachstern dagleglivet i hovudstaden, fram til både han og mange andre jødar vart arresterte. Internering, eit opphald i Berg fangeleir; og så transport sjøvegen til nazistane sine leirar. Akkurat denne delen er ikkje vesentleg annleis enn andre bøker av overlevande jødar.
Fram til han hamna i blokk 19 i Sachsenhausen, var han utruleg heldig gong etter gong, som overlevde. Eit skeivt ord, eit blikk, eit svar når han skulle teia, eller å teia når han skulle svara, kunne vera nok til å verta slegen forderva, eller eit skot i nakken. Sjølv undra han seg over at han kom gjennom dette; det kjem fram i boka mange stader.
I boka kjem det fram at det var store summar i pund som vart produsert. Pundsetlane var også av framifrå kvalitet; slik at sjansen for at det skulle verta oppdaga at dei var falske, når dei kom ut blant britane, syntest vera minimale.
Ein kom aldri så langt at planen vart sett ut i live. Ein del pengar vart gøymt unna. Så seint som i 1999 vart ein kasse med falske pund funnen i ei elv i Østerrike!
Boka har føreord av dotter til forfattaren; Sidsel Nachstern; og etterord av historikaren Bjarte Bruland. Her er også mange svart-kvitt-bilete og teikningar frå andre verdskrigen. På mange måtar ei makelaus bok og ei forunderleg soge. Ta og les!
(24.10.2006 kl. 05:00)